|
ولــــدك ألالــّــــــة ما بقى ضحك ما بقات أوناسا معلوم تظلي عسّاسا فا الشرجم تسناي خيالو ... ولدك يرجع من المدرسة إيقول ليك الحاكم : ولدك شغلاتو السياسة ولدك ما شبه اخوالو ولدك خصّاه حراسة كان لازم تكوني كوساسا ، أو بوليس إمنعو ويقمعو ما يضسر ، ما يخمم فرياسة ولدك لازماه حراسة ولدك ألالة ما شبه خوالو اعشق العامل والفلاّّح ولدك ألالة كيقولو يساري اخلاص، اخلاص تحزم للكفاح وانتينا يا لالة تتقولي قاري باراكا ألالة من لمزاح، ولدك ألالة رجليه خرجو من الشواري ولدك ألالة موسخ اضواصا ولدك ألالة لازم يتكلاصا **** ولدي أسيدي تربية يدي امقرياه أنا ولدي تلميذي ولدي بخوتو ولدي بخوالو ولدي برفاقو ورفاقو شحال وحيدة فالحب أو وحيدة فالدرب، وخوت فالنضال ولدي بقرايتو ولدي بعنايتو واخوت فالنضال ولدي فلسطيني، ولدي ظفاري واخوت فالنضال ولدي فلاحة، ولدي عمّال ولدي سعيدة ، ولدي زروال ولدي بنبركة، ولدي عمر ولدي دهكون ، ولدي رحال ما نبكي، مانتألم ما نخسر، منتهزم ما زالة نولد فالصباح أو مع لعشية نتحزم أو نعاود نقري ونعلّم كرشي فاكفايتو، كرشي فحمايتو كيدي يا نار كيدي وزيدي أولدي الرجال كيدي يا نار
علي مفتاح
فِيرْمَة امِّي
حْلِيمَ
حَمُّو وَلدْ حَادَة
شادْ وُ عاضْ فْ الوَالْدَة
طَلْ عْلِيَّ بينْ رَجْلِينْ امُّه
تَكَلَّمْ بْ لِشارَة مَا قْدَرَتْ نْفَهْمُه
شَيَّرْ عْلِيَّ بْ يَدُّه
قَلَّزْ وُ سَدْ الرِيدُو
وَ حْلَفْ ما يَخْرَجْ
فْ هَذا الزْمَانْ الَعْوَجْ
فيرْمَة
امِّي حْلِيمَة
كيفْ عَادَتْهَا ديمَا
لابْسَة تُوبْهَا الَخْضَرْ
سارَحْ فيهَا ْبنادَمْ وُ بْڨرْ
اِلا عْكَلْ ما يَرْكَلْ
وُ عَ الْتَصْفَاقْ مَا يَبْخَلْ
بْڨرْ امِّي حْلِيمَة قارِي
قاري الَقْوَافِي وُ الَهْضَارِي
اللِّيفْ ما يَنْقُطْ
لي طالَعْ ما يَهْبَطْ
لي نازَل بْقَى فْ الزْلَطْ
فْ الجْهَالة ديمَا يَخْبَطْ
بْڨرْ امِّي حْلِيمَة ذكِي
وَ فْهَامْتُه فْ ڨرُونُه
وَقَتْ الحَزَّة رَاڨدْ مْتَكِّي
كلْ مَرَّة يَصْبَغْ لونُه
مَرَّة رْيَاحُه شَرْڨيَة
مَرَّة مَسْكُونْ بْ غَرْبِيَّة
بْڨرْ امِّي حْلِيمَة مْسَيَّسْ
وُ حَزْبُه شْتِبِرَالِي
فْ الكامِيرَا يْبَانْ مْفَرْنَسْ
ديما مْفَضِّي وُ مْسَالِي
بْڨرْ امِّي حْلِيمَة تْرَقَّى
وَ تَزَادْ فْ الَكْرَادْ
خْدَا حَقِيبَة الزَّنْقَة
وُ وِزَارَة الَحْصَادْ
دَرْبُوهْ خَفَّة السَّرْقَة
وَ التفَلْيَة عَ الَعْبَادْ
بْلا مَنْجَلْ بْلا مْطَرْقَة
كُلشِي عَ العَگادْ
بْڨرْ امِّي حْلِيمَة عَلاَّفْ
وُ عَلْفُه بِيتَزَا وُ هامْبُورْغَرْ
بَزُّولَة الخَزِينَة وَلاَّفْ
يَرْضَعْ الڨَرْشْ يَصْحَاحْ يَتْگدَّرْ
يَشْرِي حْدِيدَة وُ تيليفُونْ
وُ يَصَيَّدْ بَڨرَة زَعْرَة
طالَعْ نازَلْ ديمَا مَدهُونْ
وَ فْ سَاعَة الانْتِخَابْ تَرَكْبُه النَّعْرَة
الصَّنْدُوقْ فْ الَبْڨَرْ
وُ الَبْڨرْ حَاضِي الصُّنْدُوقْ
الرَّبْحَة تَزِيدْ فْ الَهْبَرْ
وَ الخَسْرَة تَخَلِّيهْ مَدْعُوقْ
بڨرْ البَغْلَمَانْ
و نْعَاجْ القَرَوِيَّة
اللونْ كْحَلْ ڨطْرانْ
كُلشِي عَ المِيزَانِيَة
الميزانِيَة بَڨرَة ضَارَّة
وَلدَهَا حْرَامِي مْلَڨطْ
خْرَجْ بْ الَمْنَاوْبَة عَ الشْكَارَة
لونُه جيفَة مْزَرْڨطْ
بْڨرْ امّي حْليمَة نْجَحْ
اِلا ما نْجَحْ يَخْرُجْ يَسْرَحْ
يَدْخُلْ للَمْعَارْضَة
يَطْلَبْ حَقُّه مَنْ المَانْضَة
يَخْطَبْ وُ يَرْغَبْ
يَكْذبْ وُ يَسَبْ
بْڨرْ امِّي حْلِيمَة فَنَّانْ
مَعْرُوفْ بْ الْمَسْرَحْ مَنْ زْمَانْ
جامَعْ وُ طاوِي
وُ قارِي صْوالْحُه
مْصَمَّمْ وُ نَاوِي
يَرْجَعْ مْصَالْحُه
بْڨرْ امِّي حْليمَة
كِيفْ عَادْتُه دِيمَا
مَرَّة يَرْخِي
مَرَّة يَكْرُزْ الَحْبَلْ
فْ الكذوبْ سْخِي
عَ بڨرْ وُ ڨالُوا هْبَلْ
بڨرْ امِّي حْلِيمَة
كْبَارْهُمْ فْ الڨعْدَة شابُوا
عَجْبَاتْهُمْ النْوِيبَة
فْ الحَسْبَة كُلهَا بَ حْسَابُه
حْمَارْ المُوقَفْ رَكَّالْ
وُ بْغَلْ البلَدِيَّة عَمَّالْ
وُ النقابَة قَرْقابَة
طالونْهَا عالي وُ مْهَرَّسْ
بَ الرُزََّة وُ الَعْصَابَة
صَنْدُوقْهَا مَشْفُور وُ مْفَلَّسْ
الميزانِيَة ما جاتْها حَقْ الشْهَر
مَنْ زمانْ غارْقَة فْ حَيَضْهَا
تَنَاوْبُوا عْليهَا ڨرُونْ البْڨرْ
دَّاوْا شَرَفْهَا وُ عَرَضْهَا
وُ بْقَى بْڨرْ امِّي حْلِيمَة
فَرْحَانْ بْ طولْ ڨرُونُه
يَغْمَزْ لْ ميزانِيَّة
سْبَابْ الطَّيْكُوكْ وَ جْنُونُه.
اكرهت راسي
كْرَهَتْ
الظُّلْمْ وَ الظَّالَمْ
كْرَهَتْ عِيشَة « عَدِّي »
كْرَهَتْ الْمَحْگورْ
وَ الحَالَمْ
كْرَهَتْ الدْرَاعْ الَمْصَدِّي
كْرَهَتْ الجْنَاحْ الَمْهَرَّسْ
كْرَهَتْ قَلَّة الحِيلَة
كْرَهَتْ الفُمْ الَمْفَرْنَسْ
يَضْحَكْ ضَحْكَة ذْلِيلَة
كْرَهَتْ القَشَّابَة المَڨلوبَة
كْرَهَتْ الْغَمْزَة بَ التْمَحْلِيسْ
كْرَهَتْ الرُّجْلة المَعْيُوبَة
كْرَهَتْ الضَّحْكَة بَ التْفَرْنِيسْ
كْرَهَتْ الرَّاسْ الَمْطَاطِي بَ الخُوفْ
كْرَهَتْ العُنُقْ الَمْدَلِّي
كْرَهَتْ لِي يَتْفَرَّجْ وَ يَشُوفْ
كِيفْ حَقُّه مْتَلِّي
كْرَهَتْ الغَارَقْ فْ الدُّوخَة
ڨالْ
:يَنَسَِّي الَهْمُومْ
عايَشْ عِيشَة مَمْسُوخَة
عْلَى كْلامْ الحَقّ مَفْطُومْ
كْرَهَتْ الدَّاَخَلْ سُوقْ راسُه
ضَارَبْ الدنيا رَكْلَة
غارَقْ وَ زايَدْ فْ نْعَاسُه
مَعَشَّة فْ لسَانُه خَمْلَة
لِّي زْرَعْ الخُوفْ يَحْصَدْ الذَّلْ
وَ الَبْكَا وْرَا الحَقْ خْسَارَة
الزِّيَادَة ڨالُوا مَنْ رَاسْ الَبْغَلْ
رْكَلْ النَّعْمَة وَ تْبَعْ الَحْمَارَة.
تَمَنِّيتْ يَا سِيدْ الوَالِي
يَتْبَدَّلْ هذا الحَالْ
تَمَنِّيتْ النَّاسْ بْحَالِي
ما تَعِيشْ عِيشَة الَبْغَالْ
تَمَنِّيتْ الصَّابَة وَ الغَلَّة
تَسْكُنْ رِيقْ ذاكْ الجِّيعَانْ
تَزُولْ هْمُومْ هذه العَلَّة
الَحْزِينْ فينا يَبَاتْ فَرْحانْ
تَمَنِّيتْ السَّاڨيَة بَ النُّوبَة
وَ الحَرْثْ بِينا مَشْرُوكْ
الَعْوِينْ حَاجَة مَطْلوبَة
وَالعَدْلْ بينا مَدْرُوكْ
تَمَنِّيتْ الْمَنْجَجْ يَصَالَحْ قُرْشَالُه
الصُّوفْ الْمَدْزُوزَة تَدَفَِّينَا جْمِيعْ
لِي طْمَعْ فْ دْيَالْ النَّاسْ يَخَلِّي
دْيَالُه
وَفْ عِيشَة الَحْرَامْ رَاهْ يَضِيعْ
حَقْ الجَّارْ عْلَى الجَّارْ
ياكْ دَمْ وَاحَدْ يَجْرِي فِينَا
العَدْلْ بينا اِلا طَارْ
نَصَلِّيوْا الجْنَازَة عْلِينَا
لَوْ كانَتْ لِيََّامْ يا سيدي مْسَگدَة
لَوْ كانَتْ النّفُوسْ بَ الكَلْمَة مْوَگدَة
ما كان الجْدِي يَلْبَسْ تُوبْ الذِّيبْ
وَ مُولْ الفَدَّانْ فْ بْلادُه يَوّلِّي
غْرِيبْ
لَوْ كانَتْ لِيَّامْ يا سيدي مْسَگدَة
وَ اليَدْ فْ اليَدْ عْلَى الظُّلْمْ وَحْدَة
ما كانْ السَّوْطْ يَصِيرْ حْزَامْ
وَ الجُّوعْ فْ الفُمْ يَصِيرْ جْدَامْ
لَوْ كانَتْ لِيَّامْ يا سيدِي مْسَگدَة
وَ النَّاسْ لْعَشْرَة الطّعَامْ مْفَگدَة
ما كانْ الخُبْزْيَوَلِّي حَلْمْ
وَ الجْرَى وْرَاهْ يَوَلِّي ظُلْمْ
لَوْ كانَتْ لِيَّامْ يا سيدي مْسَگدَة
وَ النَّاسْ ما تَبْقَى بَارْكَة مْقَرْضَة
ما كانْ السَّوْطْ يَسْرَحْ فْ الظّهَرْ
وَ بنادَمْ يَتْسَاڨ بْحَالْ الَبْڨَرْ
لَوْ كانَتْ لِيَّامْ يا سيدي مْسَگْدَة
و النَّاسْ عَلى الظُّلْمء ما
مْبَرْدَة
ما كانْ النْسَرْ يَبْرَدْ الظْفَارْ
يَخْطَفْ بَ الغَفْلَة دِيمَا غَدَّارْ
|
